Na
Nazeefah Sabo Nashe
08033748387
Follow me on ArewaBooks
@nazeefah
https://arewabooks.com/book?id=635c58dc8a75f51b283a378e
E.O.W
_Yauma tafe nake da wani sabon rubutun wanda salonsa ya bambanta da waɗancan kamar yarda dai kuka sani. Fatana na nishaɗantar daku na kuma wasa muku ƙwaƙwalwa Sabon littafi kenan Mai Sabon Salo…_
_Daga jin sunansa kun san akwai rikita-rikita ku dai ku biyo.. ina masoya *ME ZAN YI DA ITA?.*_
Page 1
Kamar yarda ta saba tashin y’arta ta kullum, yau ma ranta a b’ace take shurinta da k’afa tana dukanta wai duk so take ta tashi. Da kyar Hamda ta bud’e idonta ta zuba su akan mahaifiyarta. Zazzafan zazzab’ine a jikinta amma hakan bai sa ta d’aga mata k’afa ba.
Ta bud’e idonta da kyar da
duk sun canja launi na azabar da take ciki, ba yau bane mafari haka dama can Ammin take tashinta daga barcin a kowace asubar fari, tamkar ba mahaifiyar da ta tsuguna ta haifota duniya ba. Duk da a kullum tana tantamar kasancewarta tsatson Ammin,saboda tsana muraran da take nuna mata, wanda ko ƴar tsintuwa sai haka a yarda Ammin take ɗaukar lamarinta.
Hawayen idonta ya zuba akan fuskarta, da gaske tana jin ƙunar lamarin sau tari Mahmah da ta ksance kishiyar uwarta tafi lura da lamarinta fiye da Ammin koda kuwa a ɓoye ne don idan ta fuskanci ka na tausaya mata ma tsanarka take sosai ta kuma ja maka kashedi game da shiga shirgin yarinyarta.
Da kyar ta miƙe zaune bayan ta dafa yaloluwar katifar ta irin ta ƴan boarding da take kwana akai ita ɗin ma tatace ta makaranta take kwana akai bayan gama karatunta. Hannayenta dafe da goshinta alamar kanta yana matuƙar sara mata ta ce “please Ammi wallahi yau da ciwon kai na tashi ba zan iya komai ba.” haɗe rai tayi idanunta cikin nata tace “ƙwarai tunda yau kika saba aikin da ciwo a jikinki kin tashi ko sai mangareki?ai tunda kika sake kika zo duniya duk da ba ke naso haifa ba wallahi kin yi ta shan baƙar wahala kenan, ko kaɗan bana son na buɗe ido na ganki na tsaneki tsana mafi muni da ban taɓa yiwa wani ita ba, ki miƙe bakinki alaikum kije ki fara aikin da kika saba.”
Da kyar ta miƙe zuciyarta na wani irin hanƙaron ɓacin rai ta zuba idonta akan gadon da yake bedroom ɗin yayyenta ne zube su uku suna shan barcinsu akan gadajen da suke zube reras a cikin faffaɗan bedroom ɗin.. kuma duk babu wanda bai bata shekaru ba a
Cikinsu babbar ta bata ak’alla shekara goma mabiyarta Ta bata shekara takwas yayinda wacce take bi ta bata shekaru shidda cif. Kuma duk ba suyi aureba. Yayarsu Najwa ce kawai mai aure a d’akin su.
Hawayenta Ya sake ninkuwa fiye da nada, ta rasa me tayiwa Ammi da tayi mata wannan muguwar tsanar ga yayyenta nan zube bata saka su aikin ba sai ita da take ƙaramarsu, madadin auta da aka sani da riritawa ita mahaifiyarta wulaƙantata take tana kuma nuna mata tsana muraran da gaske bata sonta. Ta faɗa a gaban idonta ta faɗa a bayan idonta. Hasashe kala-kala tayi tana son gano dalilin tsanar sai dai sam bata ci ribar gane gaskiya ba.
Bata Sani ba Ko don kasancewarta baƙa saɓanin su da suka kasance farare tas dasu don kalar Ammin suka ɗauko gaba ɗaya kasancewarta balarabiyar jordan, Gashinta yalolo suka ɗauko saɓanin ita da ta zamo kalar mutanen Habasha, Gashinta kuwa.cunkus yake ga taurin tsiya don ko kitsashi ba a iya yi, sau tari haka take ƙudunduneshi ta cusashi a tsakiyar kai yayi mata kamar gammo. Ba ta yiyo kyan Ammi ba ko kaɗan bata sani ba ko wannan shine silar tsanar, duk da ta sha ji mutane da Dama suna faɗin tafi ƴan uwanta kyau don dai ita ƙananan kyau ne da ita ta kuma fi ƴan uwanta dirin jiki sosai da sosai. Bata san dalilin tsanar ba duk da tana kyautata zaton wannan ne dalilin saɓanin hasashenta taji kuma mutane da dama suna faɗin don taso ta haifi mace ne a haihuwarta kamar yarda kishiyarta tayi mata fintinƙau a haihuwar yara maza to rashin zuwanta a namiji tun bayan da aka yi mata scanning aka tabbatar mata namiji ne ta ‘kwallafa rai Lamarin Allah kuma ranar haihuwar sai taga mace itama macen Gata kalar mutanen Habasha bata da Haske kamar larabawan da ta saba haifa ba.
Ajiyar zuciya ta saki mai ƙarfi bayan Ammin ta hankaɗa ƙeyarta cikin ƙaraji ta ce”wuce kafin naci ubanki, so kike ki tona min asiri ya dawo daga masallachi ya tarar kina aiki ya hau min banbamin masifa.” Tana hawayen ta shige kitchen. Ga wani mukumukun sanyi da ake zubawa mai shiga jiki. Don haka ruwan famfon ya zama tamkar ƙanƙara. Taɓashi kuma da tayin shi ya sake haddasa mata rawar ɗari take kuma zazzafan zazzaɓin ya sake sabunta a jikinta. Tana hawaye ta shiga wanke kwanukan sannan ta gyare kitchen ɗin tsaf bayan ta kunna karatun Alƙur’ani kamar kullum kafin kiran sallah na shigar lokaci ta gama da kitchen tsaf sannan ta shige bedroom don gabatar da sallah, bayan ta ɗaga katalalliyar katifarta ta ɗau panadol ta ɓalla ta sha saboda dama duk ciwon da zata yi shine dai maganinta ba wanda ya damu ya kaita asibiti taga likita itama tuni ta saba. Panadol ɗin ma Munirah yayartace take siya mata ta ce ta ɓoye saboda in dai Ammi ta gani ita kanta ranar kashinta ya bushe.
Toilet ta shige tayi alwala sannan ta fito ta fara tashin ‘kartin yayyanta don duk sun gama degree suna zaune ba aure Muneerah ce kawai a level 2 ita kuwa wannan shekarar ta gama secondary school d’inta.suna zaman jiran ministoci ko sanatoci ko ma shugaban k’asar gaba d’ayansa. Kuma Ammin ce ta da’ure musu k’ugu.
Ganin rawar d’arin da take yasa Muneerah ta kalleta cikin muryar tausayi ta dafa kanta kafin tace “Sorry Little jikinne?” Lumshe idanunta tayi zara-zaran gashin idon suka yiwa idanunta rumfa sai ga tarin ‘kwalla sun zubo mata. Ta tada Sallah kawai da sauri jin Ƙafafunta sun fara shirin gaza ɗaukarta, yasa ta zauna tayi sallahr a zaune.
Suna idarwa zazzafan zazzaɓin ya sake mata rufdugu amma tsoron masifar Ammi yasa ta dole ta miƙe ta fita don gyaran gidan. Muneerah ce tabi bayanta da sauri don dama kullum ita take tayata aikin gidan a ɓoye don idan har Ammi ta gani to ta tabbata ranar kashinta ya bushe.
Wajen zuwa zubar da sharar da take dustbin ɗin kitchen ɗin, sanyi ya kaɗata sosai take ta yanke jiki ta faɗi haƙoranta na kafkaf saboda kakkarwa ga idanunta da suke shirin ƙafewa.
Mahmah kishiyar Ammi da take tsaye a window ta saka salati da sauri ta fito daga sashenta ta ɗaga Hamda ɗin tana kiran Sunanta amma ina tuni numfashinta yayi sama, hakan yayi daidai da shigowar Abbu daga masallachi da sauri ya ƙaraso yana tambayar lafiya? Cikin muryar ruɗewa.
Mahmah ta nuna masa Hamda da take yashe a cinyarta, bai gama jin bayaninta ba ya sunkuceta da sauri yayi parking space da ita Mahmah tabi bayansa kasancewar da dogon Hijab a jikinta.
____________________________
Likitan yayi gwaje-gwaje da yawa kafin ya tura su ayi mata test ɗin typhoid da malaria.
Suna dawowa ya buɗe takardar cikin ɓacin rai ya ɗago yana kallonsu ya ce “Me yasa jama’a basu da tausayine? Yanzu haka wannan yarinyar mai aiki ce ko marainiya ko kuma wacce uwarta bata gidan aka bari ciwo yayi mata mummunan kamu haka? Typhoid malaria ga pneumonia tayi mata mummunan kamu wanda idan ba’a kiyaye ba nan gaba kaɗan zata iya zana asthmatic.” kunya da takaici ne suka yiwa Abbu rufdugu lokaci guda ya rintse hannunsa da kyau Yana jin zuciyarsa kamar zata hudo don Ɓacin rai. Tabbas Sakinat ta cuce shi bai tabbatar ita jahila bace har sai da ta haifi yarinyar nan, yau kuwa zai nuna mata zahirinsa idan da baɗininsa ta sani. “Admitting ɗinta zan yi” likitan ya faɗa ransa a ɓace don sosai yaji tausayinta ya kamashi.
Abbu ya jinjina masa kai kawai don baya jin yarda yake jin zuciyarsa zai iya furucin ko da kalma ɗaya ne.
Sai da suka shiga ɗakin ya kalli Mahmah ya ce.” ki daure ki zauna min da ita don na san ko na ce tazo ma ba zuwa xa tayi ba wallahi, na gaji da halayen Sakina a dole nake zaune da ita.” Mahmah murmushi tayi tana gyarawa Hamda hular da take kanta ta ce”Ni wallahi Abbu na rasa silar wannan tsana ni fa bana jin ko ɗan kishiya aka bar min zan yi masa wannan abin da Sakina take yiwa yarinyar nan da tunda tazo duniya bata barta ta huta ba. kuma tun ranar da ta haifeta da ta’ki Shayar da ita nace ta bar min ita amma ta’ki sannan kuma ita bata yi mata ri’ko mai kyau ba bata tunanin Allah ya kamata da ha’k’kinta?” Abbu ya girgiza kai “Tsabar jahilcine da jayayya da hukuncin ubangiji, Idan banda haka kace kai lallai ga abinda kake so ka haifa da baka samu ba kuma sai ka d’aura tsana akan wanda Allah ya baka Allah dai ya kyauta amma yau kam zan shayar da Sakina ruwan mamaki.” Daga Haka ya fice ya bar Mahmah rik’e da hannun Hamda da ake ‘karawa ruwa.
Daga yanayin parking d’in da yayi duka ma’aikatan gidan suka tabbatar ba lafiya ba, ko amsa gaisuwar da suke masa bai yi ba ya danna kansa sashen Ammi, a masife ya shiga k’wala mata kira.
Da sauri ta fito k’irjinta yana dukan uku-uku don ta tabbatar ba lafiya ba. turus tayi a gabansa tana kallon yarda yake nuna ta da yatsa cikin tashin hankali ya ke fad’in “Ban tabbatar jahila na aura ba Sakinah sai bayan da kika haifi Hamda to ina tabbatar miki ko ki canja takunki ko kuma wallahi Na guntule igiyar aurena da take kan ki wacce irin masifa ce wannan? Saboda son zuciya kin tattara tsanar duniya kin zuba akan ‘diyata don tazo a mace ita ta halicci kanta? kuma Sadiya tana son rik’eta kin hanata saboda kin fi son ta zauna a wajenki ki cigaba da gallaza mata, ga shi nan mummunan ciwo yayi mata dirar mikiya to wallahi ki tabbata idan kika yi sanadiyyar rasa ranta wallahil azim sai na makaki kotu da sunan makashiyar ‘yar da ta haifa ta cikinta. Na gaya miki na sake jaddada miki, ko su wa’dancan kitika kitikan ‘yan matan da kika ajiye a ‘daki kika hanasu aure kuna jiran mai ku’di mai suke yi da ba zasu yi aikin ba sai ita ‘yar shila Na sake jaddada miki ki fita sabgar yarinyata kuma daga yau ta koma hannun Sadiya tsakaninki da ita kallo daga nesa idan kuma kin k’i ina tabbatar miki a bakin aurenki shashashar banza da bata yarda da k’addara ba.”
Ammi ta bi bayansa da kallo tana sakin tsaki a fili tace “Aikin banza ni na zata ma wani abin tashin hankalinne ya faru yake samba’do min kira ashe akan waccar banzar ‘yar ce da ban k’i ko yanzu naji ance ta mutu ba da ina ji don murna har taka rawa zanyi.”
Muneerah da take gefe tasa hannunta ta d’auke hawayen da yake bulbula a idonta a zuciyarta ta dinga nemawa ‘yar uwarta sau’ki da addu’ar shiriya ga mahaifiyarta, da take tunanin kamar Aljannu sun shafeta lamarin Ammin yana bata tsoro mutum ‘daya ne yake iya tan’kwarata in dai yana gari Yaya Hammad to shi kuma rabonsa da Nigeria ma an doshi shekara shekara Goma sha biyu kullum sai dai matarsa tazo amma ko y’ay’ansa baya bari su zo.
tun wani mummunan duka da tayiwa Hamdan ransa ya ‘baci ya shiga gaya mata magana har da kusan marin Ammin yayi kuma a gaban kowa ya kirata jahila, shikkenan bayan kwana bakwai ya tattara ya tafi Birmingham dake k’asar England inda a can zai nemi
Aiki. yafi sati ma a abuja kafin lokacin da visar sa ta fito shikkenan bai sake waiwayar Nigeria ba idan bata manta ba lokacin Hamda bata fi shekara Hud’u ba.Ta saki ajiyar zuciya a hankali ta furta Allah ya dawo da kai lafiya Ya Hammad don tabbas Ammi shi kad’ai ne yake tan’kwarata akan Hamda.
Tana gama break fast wanka kawai tayi ta zuba na asibitin a cikin basket ta fito da sauri don nufar asibitin da aka kwantar da ‘yar uwarta. Murd’a ‘kofar yayi daidai da fitowar Ammi daga corridor d’in bedroom d’inta ta zubawa Muneerah wani banzan kallo kafin ta ce “Gidan Uwar wa zaki kai abincin nan?” Muneerah ‘kirjinta ya buga sosai tana kallon k’asa tace “Asibiti zan kai…” “Da izinin uban wa?”……..
[11/21, 2:17 PM] Nazeefah Nashe: _~ALƘALAMIN JIKAR NASHE
YA ABIN YAKE ?
LIttafin Nazeefah Nashe.
08033748387
Follow me on ArewaBooks
@nazeefah
ELEGANT ONLINE WRITERS
(Haɗin kai shine takenmu.)
_2
⭐️⭐️
Tuni hawaye ya b’alle daga idanun
muneerah jin Abbu ya ce cikin zafin rai “Da izinin ubanta, kin ga sakina ki kiyayeni wallahi, ke Muneerah zo ki wuce kije kinji Allah yayi miki albarka.” Fuskar Ammi a ɗaure take jifa masa kallo mai cike da bala’i. Ai kuwa Muneerah na fita ta sauke kwandon masifarta a kansa. “Na fa gaji da wannan rainin hankalin naka ba zaka dinga juyani kamar wata Ƴarka ba, ban maka dole ka zauna dani ba, haba ina dalili kayi ta sakin nawa mana sai me? Daɗin abin ba cusa maka ni aka yi ba, har ƙasar mu kaje ka yaudaro iyayena ka auro ni.” tsaki yaja kawai ya fice yana jinta tana sake faɗar aikin banza, kuma wallahi ba wata shegiya da zan bari ta riƙe min ƴa, a barni idan ma kasheta zan yi na kasheta ai ta wace.” Abbu girgiza kai kawai yayi, yana mamakin Sakina da ko kaɗan bata jin nauyin furta masa duk maganar da tazo bakinta. A kullum kuma sai tayi wannan zancen na ba cusa masa ita aka yi ba, wanda yasan gori ne kawai take wa Sadiya tunda itace aka yi musu auren haɗi.
A zahiri ya ce “Ai fa, ko baki faɗa ba da zan iya nima da na sahhale miki, saboda na gaji da matsalolinki matsalar ɗaya ba zan iya ba, duk wannan hargagin a baki ya tsaya Allah ya riga ya jarrabeni da tarin ƙaunarki da ya riga ya zama jinin jikina, bana jin ma zan iya rayuwa babu ke, amma shi kaɗai ya san wahalar dashi da take amma a haka yake rufe idonsa daga aikata adalci tsakaninta da kishiyarta duk da tarin haƙuri da biyayyar da Sadiya take masa amma sam baya mata so koda kashi ɗaya cikin goman da yake yiwa Sakina, ya rasa irin wannan masifa ko fushi tayi dashi yana rasa sukuni har sai ta sauko yaga murmushinta sannan ya ke sakin ransa da samun kwanciyar hankali. Bai sani ba ko don kasancewarta daga jinsin larabawa,shi yasa ya ke mata kallon tafi sauran mata?
_________________________________
Da sauƙi sosai a yanayin da ta samu jikin ƴar uwartata.
Muneerah ta sakar mata cute smile kafin cikin tsananin ladabi ta durƙusa ta gaida Mahmah, ita dai tana ganin mutuncin matar nan duk da ƙoƙarin cusa musu tsanarta da Ammi take. Sadiya ta shafa kan Muneerah kafin ta furta “ƴar albarka yau ba’a tafi Islamiyyar ba?” murmushi ta saki tana ajiye basket ɗin hannunta ta ce “Zuwa nayi na zauna kije gida ki huta kada su Humaid su buƙaceki don na jiyo rigimarsa ma da zan fito da na tambayi Saliha mai aiki sai ta ce wai Islamiyya ce ba zai je ba.” Riƙe haɓa Mahmah tayi tace “Kiji min ja’irin yaro amma Humaid akwai ɗan kirki shikkenan bari naje na dawo bayan la’-sar sai na kwana da ita, kinga ai ba za’a barki ke kaɗai ba naga ma jikinnata da sauƙi ƴar nema ta sha allurai.” Ta faɗa tana shafa gefen kumatun Hamda da haka kawai take mata wata irin ƙauna ji take kamar jininta kamar kuma daga tsatsonta ta fito. Hamda ma rintse ido tayi tana ayyana da ana shawara da mutum kafin yazo duniya da tace ita tafi son zuwa a tsatson Mahmah mace saliha mai kyautayi jin ƙai da bata ɗau duniya a bakin komai ba. Banda tata uwar da ta tattara duk saɓanin halayen Mahmah a hankali ta ce “Nagode Mahmah sai kin dawo.” Haɗe rai Mahmah tayi tace “Kul na sake ji, ba godiya tsakaninmu yarda na ɗauki ƴaƴan cikina haka na ɗaukeku, zan iya yi muku duk wata hidima da ta kama uwa zata yi ga ƴaƴanta Ubangiji Allah yayi muku albarka gaba ɗaya.” suka amsa da ameen gaba ɗaya suna bin bayanta da kallo har ta fice daga bigiren da suke. Muneerah ta saki ajiyar zuciya a fili ta furta Mahmah Uwace ta nunawa ayi alfahari da ita ubangiji ka shiryi Ammi itama. Hamda runtse ido tayi kafin ta ce ameen cikin rawar murya da gaske tana jin raɗaɗin da ya ninka na Muneerah a ranta.
Da yamman kuwa Sadiya ta yakice duk wasu tarin ayyukanta duk da yawan da suka yi mata, kasancewar Didi mahaifiyar mai gidansu a gobe ake saka ran zuwanta daga ƙauyen Gwarzo kamar yarda ta saba duk shekara a watan azimin tsofaffi take zuwa sai kuma ta tafi bayan sallah babba bayan ta dawo daga aikin Hajji. Idan kuka lissafa zaku ga wata shidda take a kano tayi watanni shidda a gwarzo.
Macece mafaɗaciyar gaske kuma idan tazo duk wani iya shegen Ammi sai dai tayi shi a bayan idonta kasancewar ta san ba ita bace ƴar gaban goshinta asali ma tun sanda ta bayyana muraran a matsayin matar ɗanta ta nuna mata tsana ba tayi farin ciki ba sam da auren nasu. Duk da dai bata nuna mata baƙin hali amma fa kaifi ɗaya ce kana yi zata kiraka ta gaya maka gaskiya ko mai zaka yi kuwa. Ga shi Allah ya zuba mata kwarjini da duk tsaurin idonka baka isa ka kalleta ka gaya mata magana ba sai dai a bayan idonta. Ba kuma ta son ƙazanta kuma duk sanda tazo dama janye Hamda take ta mayar sashenta.
Ƙyale Sakina kawai tayi ba don tafi ƙarfinta ba sai don tana son taga ƙarshen rashin mutuncinta, tana so kuma ubangiji ya shayar da ita ruwan mamaki shi yasa ma bata ɗauketa ba don idan ta ɗauketa tabbas Sakina taci riba a wajensu tunda ta bayyana ƙarara kenan ita take juya su.
Shirye-shirye da gyaran ɗakin ya hana Mahmah zuwa asibitin sai bayan ƙarfe biyar, sannan ta tafi bayan ta tura Humaid gidan yayansu na biyu Hamidan ya kwana, don idan ta barshi da Saliha wahala zai sha, da Hamood yana nan ne ma da sauƙi to ya tafi karatu can ƙasar Egypt.
Da Abbu suka tafi asibitin, suka bar Ammi a jikin window sai cizon yatsa take ganin yarda suke tafe cikin nishaɗi sai tuntsira dariya suke, wato ita ya mayar ƴar banza bai damu da ɓacin ranta ba tana sane taƙi fita gyaran ɗakin Didi, duk don ta samu ya kulata amma kamar ya san manufarta ya tattara ya watsar da ita da kansa ya zage aka yi aikin dashi da Mahmah don a dokarsa bai yarda ƴan aiki suyi masa aikin uwarsa ba don ƙarara ta nuna masa bata son hakan kasancewarta mai tsafta da tsantseni.
Kamar ya san tana lafe a window tana kallonsu ta taga ya buɗewa Sadiya ƙofar motar yana jifanta da wani irin murmushi da ya tunzira zuciyar Ammi taji wani kishi yana katantawa da ita, har yau ta kasa iya danne kishinta akan Sadiya duk da ta fita da komai amma haushinta take ji sosai tana tunanin duk duniya ba wanda ta tsana sama da Sadiya musamman da tayi mata zarra wajen haihuwar ƴaƴa maza don ita kaf ƴaƴanta biyar maza ne ba mace ko ɗaya abinda yake sake baƙanta ran Ammi kenan musamman idan kalmar ‘ Sadiya taci gida’. Ta faɗo dodon kunneta da mafi yawan akasarin mutane suke faɗa musamman a wajen taron biki ko suna na dangin mijinta, kai har da ma na mutuwa ta sha ji ana mata gori ko don mutanen sunyi la’akari da yarda maitarta ta fito a fili na son haihuwar ƴaƴa maza ne shi yasa ake jifanta da zancen? Da sauri ta saki labilan tana runtse ido tuno da maganar da likita yayi bayan haihuwar Hamda ya tabbatar mata da ba zata sake haihuwa ba saboda mahaifarta ta taɓu dole aka juyata haka dole tana ji tana gani burikan ta suka bi iska, tayi burin haihuwar ƴaƴa maza ita ba don gado bama don son taje gidajensu ta shimfiɗa mulki kamar yarda Didi take shimfiɗa mulkinta a gidajen nata yaran.
Tana jin tashin motarsu ta saki tsaki haɗe da furta zaka biyo dare ka nemeni ne wallahi kayiwa kanka sai nayi sati ban baka haƙƙinka ba, ta tabbata kuma sai ya kusa suma don idan tayi masa yaji ko na kwana ɗaya ne ranar girkinta zama yake yayi mata kuka yana roƙonta, don da gaske shi kaɗai yasan ruwan zallar daɗin da yake kwankwaɗa a jikinta balle sati! ta saki murmushi da ta tuna haɗaɗɗiyar zumar da ta siya da zata kusa zautar dashi a zahiri tace gidan ka tarar.
_____________________________
Da sauƙi sosai suka sameta don likita ya tabbatar musu zuwa safiya ma idan drip ɗin da ake saka mata ya ƙare za’a iya sallamarta. Mahmah da kanta ta zauna tana bata kunun gyaɗar da ta damo mata ta sha kuma sosai har sai da tayi gyatsa. Abbu murmushi kawai yake yana sake jaddada kimar Sadiya a zuciyarsa, da gaske ɗin ita ta dabance zuciyarta mai kyauce,Mai halin mutanen farko shi yasa kullum yake mata kirari da Hali dubu.
Kashegari kuwa aka sallamesu, ko kafin suje gida tuni Mahmah tayiwa Saliha waya ta ce ta gyara mata ɗakin da yake kusa dana Humaid nan zata saka Hamda a ciki, duk da bata da tabbacin uwarta zata yarda sai dai wannan karan Abbu ya tsaya kai da fata ya ce dole nema ta yarda tunda ita bata sonta bata isa ta hana wani riƙeta ba.
Suna shigewa sashenta Ammi ta fito a sukwane cikin bala’i ta shiga ɓangaren Sadiyar tana zuwa ta shiga surfa bala’in sai an fito mata da ƴarta ai ba uban wanine ya haifa mata ita ba matar shige kawai borar gida”
Sadiya murmushi ta saki kafin ta girgiza kai ta ce”Wallahi ba zata fito ba sai dai idan Ubanta ne yazo ya fitar da ita da kansa, kuma alhamdulillah borar gida ita ta zama uwar mazan gida mowa kuma ta haifi mata…… Wani kukan kura Ammi tayi, tayi kanta yasa na runtse ido don na tabbata ba za’a kwashe da daɗi ba.
[11/21, 2:17 PM] Nazeefah Nashe: _~ALƘALAMIN JIKAR NASHE
YA ABIN YAKE ?
LIttafin Nazeefah Nashe.
08033748387
Follow me on ArewaBooks
@nazeefah
https://arewabooks.com/book?id=635c58dc8a75f51b283a378e
ELEGANT ONLINE WRITERS
(Haɗin kai shine takenmu.)
_3
Ya abin yake?
Daban yake da sauran.
Da sauri Sadiya ta fincike wuyanta
haɗe rai sosai tayi ta ce “kada ki fara kada kiyi wannan kuskuren, ko ina yarinya ban yarda da dambe da kishiya ba, balle yanzu da nake da ƴaƴa da jikoki har da surikai.”
A zafafe Ammi ta ingijeta tare da ɗaga hannu zata zabga mata mari dai-dai lokacin da drivern Didi ya danno hancin motarsa cikin gidan tare da sakin gigitaccen horn, bisa bin umarnin Didi don sanar da masu gidan zuwanta, wanda hakan shine tambarinta.
Cak Ammi tayi da hannunta cikin matuƙar ɓacin rai da haushin bayyanar jarababbar tsohuwar, tayi tsaki ta fice daga sashen Mahmahn da sauri don ta san tabbas Didi tazo ta tarar da wannan tashin hankalin ranar na lahira ma sai yafi ta jin daɗi. Mahmah tayi murmushi kafin ta furta “Gaba da gabanta”da ki tsaya mana. Sannan tayi azamar fita don tarar Didin.
Fuskar Didin a washe take kallonta, da duk jama’ar gidan tana amsa gaisuwarsu cike da murnar samunsu lafiya, ahalin Sakina ne kawai bata gani ba. Bata damu kanta ba ta san dalilinsu na ƙin zuwa bai wuce ba sa son tayi musu gorin rashin aure ba, alhali ba mijin suka rasa ba suna dai jiran wanda ya ci ya tada kai.
Murya a cunkushe ta kalli Sadiya ta ce”Ita hakimar kishiyar taki tana ina?”
Mahmah ta ɗan yi jim kafin ta ce “Ina ji sallah take tunda baki ganta ba.” ta samu kanta da gillara ƙarya duk don ta gyara lamarin. Didi ta kalli agogon hannunta kafin ta ce “Sallahr walaha take Kenan da sha biyun rana? Sadiya kenan kishiya kike karewa don kada nayi mata sababi? ai ba tun yau na san Sakina bata ƙaunar taga nazo gidannan ba, saboda bata son na sawa yaranta ido to wannan karan a shirye nazo tsaf wallahi ba zan bar gidannan ba sai na aurar da iyayen matan da ta girke a ɗakinta, su ba zawarawa ba su ba ƴan mata ba, shi kuma soloɓiyin mijinku ya saka mata ido sabida baya son laifin balarabiya.”
Sunkuyar da kai Sadiya tayi kafin ta ce “Kiyi haƙuri Didi ai aure lokacine da zarar lokacinsu yazo ko suna so ko basa so sai sun yi.”
Dai-dai lokacin da Ammin ta shigo kuma duk wani sababin Didin akan kunnenta take yi ranta ya sake ɓaci shikkenan wannan matar zata zo ta ɗaga mata hankali.
Fuskarta ba yabo ba fallasa tayi sallama haɗe da faɗawa cikin parlourn. Didi ta zuba mata ido tana jijjiga kai ganin yarda Sakinan ta cono ɗankwali har gaban goshi,alamar dake nuni da cewa a shirye take da amsar duk wani rashin mutunci na Didin.
Murya a cunkushe ta fara gaisheta Didin ta yamutsa fuska kafin ta ce “Ai Sakina da kin bar gaisuwarki tunda ba dole nace sai kinzo kin gaisheni ba, ba buƙatar ta nake ba gaisuwar da za’a yiwa mutum ana faman ɗaga hanci dai-dai nake dake wallahi, ki bini a hankali kafin ki kaini bango.” Sakina dai ɗan murmusawa tayi wanda direct zan iya kiransa dana rainin hankali ta miƙe cike da izza tace “A huta lafiya Didi” daga haka ta kaɗa zaninta ta wuce ta bar Hajja Didi da hangamemmen baki don kuwa ta hango raini tsagwaronsa a fuskar Sakina, girgiza kai tayi kawai tana kallon Sadiya tace “Shahara iyye! Cabd’i jam” girgiza kai itama Sadiyar tayi ita kanta tana mamakin yarda Sakinah ta fetsare har haka? Didin da ko ido mutane basa iya haɗawa da ita idan tana magana. Ita dai murya a sarƙafe ta hau bata haƙuri sannan ta miƙe don ta bawa Didin waje ta huta har ta kai bakin ƙofa Didin tace “Ina Hamda ne ban ganta ba ko bata gama gallafirin makarantar kwanar bane?” Sadiya ta girgiza kai ta ce tana ɓangarena bata da lafiya ne yau ma aka yi discharging ɗinmu daga hospital ai da tuni kin ganta ta fito.”
“Subhanallahi me ya sameta haka? Yanzu haka shaiɗaniyar uwarta har yau bata san annabi ya faku ba ko? Wannan mata sai kace wacce tazo a zamanin jahiliyya ƙiri-ƙiri ka ƙi ƴarka ba laifin tsaye ba na zaune, muje in ganta ai gwara da aka mayar da ita ɓangaren naki, naga uban da zai ce sai ta koma gurin wulaƙantacciyar matar can da ta zamewa mijinki matar jaraba.” Ita dai Sadiya murmushi kawai ta saki ta bi bayan Didin tana tafe tana riƙe zaninta da yake shirin faɗuwa.
A kwance suka sameta idanunta a lumshe lokaci guda ta sake zabgewa dama ita ba jikin arziki ba kyalan-kyalan take tamkar ta faɗi ko don bata da kwanciyar hankali ne Allahu ya alamu. Didin da sauri ta ƙarasa gefen gadon ta zauna tana dafa goshin Hamdan, da kyar Hamdan ta buɗe idanunta da suka zama tamkar garwashi ta zuba su akan Didi tana sakin wani malalacin murmushi, tana shirin miƙewa Mahmah ta ce “Koma ki Kwanta Ke da ba kya jin daɗi.” Wani kallo Didi ta zabga mata kafin ta ce “Ta zauna a ina? Bayan Allah ya kawo ni, ke tashi dahalla mu wuce idan banda kafirin iyayi na Sadiya me ye haɗinki da ita da har zaki rabamu? Sadiya ta gumtse dariyarta ta ce “Ayi haƙuri Didi bari na taimaka mata ta koma ɓangarennaki” “Ya dai fi, in banda shegantaka ba ita take taya ni hira ba, sai kuma a barni can a zaune ni kaɗai kamar wata mayya dama ku gidannan ba wani yawan arziki ba kowacce ta tsaya ragwanta daga haihuwa biyar kawai ni sai da na haihu sau goma sha huɗu ke da kanki kin sani zama ne kawai Allah baiyi zasu yi ba, Huɗu kacal Allah ya raya min na kuma gode masa a hakan ma, muje dahalla kin tsaya min wani iyayin banza.”
Ammi da take tsaye a jikin window ta hango fitowarsu ana rirriƙe da Hamda wani abu mai kama da tausayi yaso shiga ranta amma sai tayi tsaki kawai ta saki labilan zuciyarta na sake ɓacin ran ƙin barinta ta cigaba da wahalar da Hamda da aka yi, yarinyar da ko sunanta bata son ji bare karo da baƙar fuskarta.
Didi suna shiga ɗakin ta hau damawa Hamda fura da nononta mai kyau da tazo da shi, sai garin fura mai ƙanshi da aka yi mata dakan hannu sai zabga ƙamshi yake. Sosai damun yayi kyau sai ƙamshi take bata saka mata sugar ba sai zuma farar saƙa.
Da kyar Hamda ta miƙe ta karɓi furar ta fara sha dama Allah ya zuba mata son fura don dai bata samu ne sai Didi tazo, don wani lokacin da gangan Ammi take dama furar kuma ta hanata ta bawa masu aiki saboda ta san tana tsananin son furar. Ta lumshe ido tana jin daɗin zuwan kakartata da ta tabbatar soyayyar da take mata babu algus. Sosai ta samu ƙwarin jikinta har ta miƙe da kanta ta shiga toilet tayi alwala tazo ta tada sallah a gefen Didin da take sallahr itama.
Suna idarwa suka jiyo sallamar su Muneerah Najma da Nasma fuskar Muneerah ce kawai a washe banda ta su Najma da suka yi kamar an aiko musu da saƙon mutuwa.
Muneerah da sauri ta isa wajen Didin tana gaisheta, itama cike da kulawa take amsawa tana son Muneerah musamman da yake ita sunanta taci “Ina kika shiga tun ɗazu ban ganki ba?” Muneerah tana ɗibar fura ta ce “Wallahi Didi Islamiyya naje da na gaji da tsimayin zuwanki.”.Didi ta ce “Masha Allah ubangiji ya bada nasarar karatu. Ku kuma asararru ina kuka shige ana nan dai ana haɗa kafaɗa da iyaye an ƙi aure ko? To ku kwana da saninku wannan karan da shirina nazo inma ku fitar da miji ko ni na fitar muku acan Gwarzo cikin dangi ko abokan arziki, na baku wata ɗaya kacal wallahi wannan karan ba zan karɓi uzirinku ba ko kun wuce azimi ba zaku wuce sallah ƙarama ba insha Allah ku haƙura ku zaɓi ko waye tunda govenor da shugaban ƙasar har yau ba su ganoku ba, sai ku rungumi haƙuri kafin furfura ta fara bayyanar muku a gida, don kyan da kuke taƙama da shi zagwanyewa zai yi matuƙar babu aure shashashai kawai.” suna gama gaisheta suka miƙe ransu a. ɓace da tijarar da take musu suka ƙarasa wajen Ammi Suna shiga taga alamun Didi ta kunnosu tsaki tayi kawai tayi kafin ta tambayesu mai ya faru? Najma ta zauna tana zuba tagumi ta ce “Jarrabar tazo yaushe zamu ga dai-dai daga zuwanta har ta fara zancen aure wai mu zata haɗa da ƴan gwarzo kurt da kuwa sai ta gwammaci kiɗa da karatu wallahi don ba mai saka ni auren mutumin ƙauye.”
Tsaki Ammi tayi kafin ta ce “Ya zama kuwa dole na tashi tsaye wajen samo muku mazaje na kece raini ko da kuwa zanyi yawo tsirara burina naga kun auri mazan kece raini da zanyi tunƙaho dasu a matsayin surukai tunda dai Allah bai bani yara mazan da nake burin naje gidansu na baje mulkina ba, kamar yarda waccan tsohuwar take baje nata, tun ina yarinya ban fi shekara sha shidda ba nasa wa raina son haihuwar ƴaƴa maza ganin yarda yayar Mamma na take baza mulki a gidajen ƴaƴanta maza Ita kuwa Ummi mu kawai ta haifa mata bata da inda take zuwa tayi tunƙaho sai daga baya ta haifi ƙaninmu shikkenan na sawa zuciyata burin haihuwar maza amma Allah bai cika min burina ba, duk da ƙoƙarin da nayi tayi akan haka.”
Tana faɗar haka hawaye ya shiga gangaro mata akan fuskarta wanda hakan yake nuni ƙarara da zallar ɓacin ran da yake zuciyarta.
Ko da Abbu ya dawo zancen dai ɗaya ne Didi ta tareshi da shi ta kuma tabbatar masa wannan karan da gaske take dole ne ta aurar dasu da son su ko ba son su, su suka kawo mijin ko akasin haka ta sake jaddada masa “Idan har kaga hakan bai faru ba tabbacine na rashin rayuwata, amma ko sharafa nake a gadon asibiti sai na aurar dasu banda tsiya ko Munirah da Hamda sun kai munzalin aure. Shima kuma Hammad ka sanar dashi ya tattara ya dawo gida Yaro shekara sha uku yana can zube a ƙasashen masu jajayen kunnuwa yayi sammakal ko matarsa yana can aka Kai masa ita, ai barewa ba tayi gudu ɗanta yayi rarrafe ba. To wannan karan da shirina nazo ƙwal uban kowa zan ci har shi Hammad ɗin da ku iyayensa.” Abbu dai sunkuyar da kai yayi yana jaddada mata za’a yi yarda take so.
Leave a Comment