*ƘADDARA CE!*
_(Destiny unfolds with a heavy heart)_
*©SALMA AHMAD ISAH.*
*CANDY🦋*
•••
Assalamu alaikum jama’a.
Barkan mu da wannan lokaci. Sannun mu da sake saduwa da ku a sabon littafina me taken ƘADDARA CE!.
To, kamar littafin HASKE, shi ma wannan paid book ne. A kan ₦300 kacal. Amma kafin nan ina ɗauke da free pages har guda 10.
To sai ku gyara zama, domin karɓar wannan da zafinsa. Kamar dai yanda kuka saba karɓar duk wani rubutu nawa.
*⚠️ Ban yarda da wani/wata. Ya sarrafa min littafi ta ko wace hanya ba tare da izinina ba. Saboda yin hakan, babban kuskure ne. Da fatan za mu kiyaye, a bi doka a zauna lafiya.*
Na sadaukar da wannan littafin zuwa ga duk wata ‘ya mace dake fama da cutar sickler…
•Gaisuwa zuwa ga Khadeeja Candy, Hadiza D Auta, Sadi Sakhna, Nainerh KD, Fatima Ahmad Isah da kuma Amina Ahmad Isah. Allah ya kare min ku a duk inda kuke.•
*SHIMFIƊA…*
KADDARA!
Shin me cece ita?.
KADDARA na ɗaya daga cikin hukuncin Allah da ya kan zartar a kan bayinsa tun yayin hallita.
KADDARA tamkar zagayen zobe take, wanda ɗan adam ke rayuwa a tsakiyarsa.
Duk wani abu da ya samu bawa tun daga ranar haihuwarsa zuwa ga ranar da zai koma ga mahallicinsa sunansa KADDARA.
KADDARAr ko wani bawa na rubuce ne tun kafin ya iso zuwa duniya.
Kowa da ka ga yana rayuwa a doron duniya yana yin ta ne a doron KADDARA.
KADDARA na ɗaya daga cikin manya manyan siffoffin Allah subhanahu wata’ala.
Domin duk abin da ya samu bawa a rayuwa muƙaddari ne daga wurinsa. Wa lau me kyau, ko akasinsa.
بسم الله الرحمن الرحيم
*01*
*Unguwar Fantai, Haɗejia local government, Jigawa state.*
*Da misalin 08:20 na dare.*
Matashiyar yarinya ce tafe a gefen hanya. Hannunta na dama riƙe da farin bokitin fenti. Yanyin yanda doguwar rigar atamfar robar da take sanye da ita ke mannewa a jikinta zai sa ka fahimci cewa ana cikin yanayin hunturu ne.
A hankali take ɗingisa ƙafarta ta hagu wadda daga gani bata da lafiya tun asali. A kallo ɗaya da za ka mata za ka san cewa tana ɗauke da ciwon sickler. Saboda kalar idonta da yake yalo. Da cikinta da ya tashi kamar na me jaririn ciki. Da kuma yanda yanayin jikinta yake nuna cewa tana da sickler.
Damuwa ce kwance a kan allon fuskarta dake nuna nau’in jinyar da take fama da ita. Kuma damuwar tata ta samo asali ne sakamakon wani da ya karɓi kunun ɗari biyu a wurinta ya sha. Ya tashi ya tafi ba tare da ya bata kuɗi ba.
Ba wai wannan ne ya jefata cikin damuwa ba. Fargaba take na yanda za su kwashe da matar babanta Auwwa. Saboda kunun nata ne, ita ce take mata shi dan ta je ta siyar ta kawo mata kuɗi. Kuma a kullum cikin gargaɗarta take kan kada ta kuskura ta bada bashi ko da kuwa kunun zai yi jangwaɓo ne.
Jiki a sanyaye ta dakata a ƙofar gidansu na masu ƙaramin ƙarfi. Ta ɗaga kai ta kalli gidan tana jin yanda iskar da ake a garin take shiga har cikin ƙasusuwan jikinta da ba su da ƙwari. Ga kuma yanda ƙafarta ta hagu ke mata ciwo tun a safiyar yau da ta tashi. Kasancewar lokacin sanyi shi ne lokacin da ciwon sickler ya fi zaɓar ya dinga tashi a-kai-a-kai.
Yawu ta haɗiye a sanda ta hasaso irin azabar dake jiranta a cikin gidan. Ko da rantsuwa za ta yi ba za ta yi kaffara ba kan cewar yau sai ta yabawa aya zaƙinta. Dan Auwwa ba ƙyaleta za ta yi ba.
Cikin saddaƙarwa da sallamawa rayuwa ta shiga gidan, bakinta ɗauke da sallama. A tsakiyar gidan ta ci birki. Sakamakon arba da Auwwa da ta yi, zaune a tsakar gida tana firfita murhu. Wutar dake cikin murhun ta kalla. Sannan ta faɗawa kanta cewar sai an ɗana mata wannan wutar a fatar jikinta.
Saboda tsabar Auwwa muguwa ce. Ba ta hukuntata da komai sai da wuta. Hantar cikinta ce ta kaɗa, a sanda hankalin Auwwan ya kai kanta. Wata uwar harara ta watsa mata tana faɗin.
“Kunu ya ƙare yau?”
Cikin fargaba ta gyaɗa kanta tana aje bokitin hannunta a tsorace. Auwwa ta harerata tana faɗin.
“Miƙo min kuɗin nan na lissafa shi.”
A hankali ta matsa kusa da Auwwan tana jin ƙamshin azabar da za’a mata na kusantota. Ta tsugguna a ƙasa. Sannan ta sa hannu ta ciro cinikin da ta yi a cikin jaka. Ta miƙawa Auwwan tana jin ƙwallar azabar da ba’a mata ba na cika idonta.
Auwwa ta karɓi kuɗin. Sannan ta shiga lissafawa. Har zuwa lokacin matashiyar na tsugunne tana sauraron hukuncinta. Cike da masifa Auwwa tace.
“Ina kika kai ɗari biyu?”
Matashiryar da ƙwallar idonta ta fara zubowa ta ɗaga kai ta kalli Auwwa. Sannan ta girgiza kanta tana faɗin.
“Salisu osi ne ya karɓi kunun na ɗari biyu ya sha. Da zai tafi nace ya bani kuɗin… Shi ne yace… Ya ce wai sai gobe zai bada, yanzu babu canji a wurinsa!…”
Ba ta kai ga rufe bakinta ba wani mari me ƙarfi ya sauƙa a kan kuncinta. Ta fashe da kuka tana dafe wurin. Cikin ƙanƙace ido Auwwa tace.
“Maimuna sau nawa nake ja miki kunne kan bada kayana bashi?. Saboda irin wannan ya sa sai na auna kununa ko na nawa ne, sannan nake baki ki fita da shi… Amma sai da kika ha’ince ni. To ba ki sha ba!”
Auwwa ta kai ƙarshe tana rarumar bakin wutar dake cikin murhu, sannan ta kamo hannun Maimuna ta ɗora mata shi a kan tafin hannunta. Haka ta dinga ƙwalla ihu tana kuka tana faɗin ba za ta sake ba. Amma Auwwa bata ƙyaleta ba sai da ta tabbatar da ta ɗauke mata fatar tsintsiyar hannun sannan ta saketa.
“Gobe ma ki sake bawa wani bashin kayana kin ji?… Kuma ki zo ki zauna ki kaɗa min miya”
Cike da jin raɗaɗin da hannunta yake mata. Maimuna ta gyaɗa kai. Tana jin yanda fatar wurin da Auwwa ta ɗora mata wuta ke tashi. Auwwa ta miƙe daga kan kujerar da take zaune. Sannan ta shige ɗakinta.
Yayin da ita kuma Maimuna ta ja jikinta ta zauna a kan kujerar tana kukan da ya zama abokin rayuwarta tun tasowarta. Saboda a rayuwa ba ta jin tana haura sati ɗaya ba tare da ta yi kuka ba tun da ta zo duniya kuwa.
Iyaye su ne bango kuma abin jinginar ‘ya’yansu masu rauni. Ita bata ta so ta ga iyayenta a raye ba. A lokacin haihuwarta mahaifiyarta ta rasu. Kasancewar mahaifinta direban tirela ne ya sa lokacin da aka haifeta yana garin Lagos. Labarin samun ƙaruwa tare da rashin da aka masa lokaci guda ya sa ya ɗauko motarsa domin dawowa gida.
Sai dai kuma cikin nufin Allah sai ya gamu da haɗari a hanyarsa ta Kano zuwa Haɗejia. Hakan ya sa ta taso a wurin matar babanta ta farko wato Hauwa, wanda ake kira da Auwwa. Duk da kakarta ta wurin uba tama da rai, amma haka aka barta a wurin Auwwa tana gasa mata aya a hannu tun tana ƙarama.
Da Allah ya so jarrabarta sai ya sa ta taso da cutar sickler wanda aka haifeta da ita. Ita kuma cutar sickler cuta ce da take buƙatar kulawa da kuma bin doka da ƙa’idojin da cutar bata so. Amma sai ga shi ta taso a hannun matar da bata sonta, ballantana har ta bata wata kulawa da me cuta irin tata ke buƙata.
Hakan ya sa cutar ta kassarata sosai. Dan babu ta yanda za ayi ka ganta ka kasa sanin cewa tana da sickler. A hankali ta share ƙwallar da ta gama ɓata mata fuska. Sannan ta kai hannunta na dama ta ɗauki ledar kukar da ta siyo ɗazu kafin ta tafi tallar kunu.
Ta yi amfani da hannunta na hagu da yake zugo ta kunce laidar. Sannan ta saka ludayi a cikin miyar, ta shiga kaɗa miyar da ta san bata isa cinta ba a yau. Dan tun tana ƙarama ta saba da horon yunwa. Shi ya sa kullum take ƙarewa kamar tsinken kwakwa.
Sai da ta gama haɗa miyar, sannan ta sauƙe tukunyar. Ta faɗawa Auwwa cewar ta gama haɗa miyar. Auwwa tace mata to ta kashe wutar, dan kada ta mata asarar ice. Duk da ita ta so ta zauna ta ɗan ji ɗumin wutar haka ta kashe. Sannan ta koma ɗan ƙaramin ɗakin da yake a matsayin nata.
Ta ɗauko ledar magungunanta da kawunta ƙanin mahaifinta kan sai mata idan dama ta samu. Ta ɗauki palludrine da folic acid. Magunguna biyu da sukafi sauƙin kuɗi na masu sickler. Ita palludrine aikinta shi ne sace sefar cikin me sickler.
Abinda ya kan kawowa masu ciwon sickler ƙaton ciki shi ne kumburar sefa. Kuma ita ce takan jawowa masu sickler ciwon cikin ɓari guda. Sannan idan sefar me sickler ta kumbura ne zai sa ta janye jinin jikin me sickler, ta yanda sai an ƙara musu jini. Ita kuma folic acid amfaninta shi ne hana daskarewar ɓargon me sickler.
Daskarewar ɓargo shi kan haddasawa masu sickler ciwon jiki da kuma na ƙafafu a wasu lokutan. Shi ya sa ake sanar da masu ciwon sickler su riƙa shan ta kullum sau ɗaya a rana.
Bisa ga mamakinta sai ta ga folic asid ɗin ta kare. Palludrine ɗin ma saura ɗaya. Zama ta yi ta ɗauki palludrine ɗin. Ta jefa a bakinta ta fara taunawa ba tare da ruwa ko wani abun da zai taimaka mata wurin haɗiye ƙwayar ba.
Saboda irin waɗanan abubuwan ta saba musu. Har gwanda ma folic asid, wata tana da zaƙi, wata kuma bata da ɗanɗano, amma palludrine tana da ɗaci. Sai dai kuma ita sabo ya cire mata wannan abin.
Kwanciya ta yi hannunta na hagu na ci gaba da mata zugi, ga yanda sanyi yake ƙara ratsa ƙashin jikinta. Zanin atamfar da kakarta ta bata domin rufuwa ta ɗauko ta lulluɓa tana jiran ɗaukewar ƙafar mutanen gidan.
Tana nan kwance ta ji sanda Gambo yayanta, kuma tilon ɗan Auwwa ya shigo gidan. Tana jin sanda ya ɗauki abincinsa ya fita daga gidan, saboda shi ba ya kwana a gidan. Sannan tana jin sanda Auwwa ta gama cin nata abincin ta koma ɗaki ta kwanta.
Sai da ta tabbatar da Auwwa ta wuce birnin sin a duniyar bacci, sannan ta saci ƙafa ta fito daga ɗakinta. Ta ɗauki takalmanta ta fita daga gidan. Sai da ta yi nisa da layinsu ta saka takalmanta. Sannan ta ci gaba da ɗingisa ƙafarta ta nufi unguwar Fanisau dake haɗe da unguwarsu.
Dan ba wani banbanci tsakanin unguwar Fantai da Fanisau ɗin, kawai dai an raba unguwar ne. Kuma ita unguwar Fanisau ta fi unguwar Fantai kyawawan gidaje. Wani babban layi ta nufa. Inda ta tsaya a bakin gate ɗin gidan da ya fi ko wanne girma a layin.
Tana hawayen famun ƙunan hannunta da ta yi ta ɗaga hannunta ta ƙwanƙwasa ƙaramar ƙofar shiga gidan. Tana tsaye a wurin ta ji muryar ne gadin gidan daga ciki yana faɗin.
“Waye a nan?”
Ta goge hawayenta tana faɗin.
“Baba Habu Maimuna ce!”
“Ah-ah! Maimunatu? Me ya faru?”
Baba Habu ya buɗe ƙofar yana faɗa. Hasken fitilun dake ƙofar gida suka haske masa fuskarta. Ya dubeta yana mamakin abin da ya fito da ita da wannan daren.
“Baba Auwwa ce ta ƙonani. Shi ne na zo wurin Mummy!”
Ta faɗi tana nuna masa hannunta da ya ƙone. Baba Habu ya kama baki cike da tausayawa marainiyar Allahn yace.
“Assha! Assha! An ya kuwa Auwwa tana so ta gama da duniya lafiya?”
Ita dai bata sake ce masa komai ba, sai zubar hawaye da take. Saboda ji take ma kamar yanzu ta yi raunin. Baba Habu ya buɗe mata ƙofar tare da faɗin.
“Shigo Maimunatu! Sannu!”
Ta shiga cikin katafaren gidan tana ɗingisa ƙafarta ta hagu.
“Ita kuma ƙafar me ya sameta?”
Baba Habu dake rufe ƙofa ya tambaya. Sai ta tsaya tana faɗin.
“Yau da safe na tashi tana min ciwo!”
“Sannu kin ji”
Sai ta gyaɗa kanta tana nufar cikin gidan. Da ƙyar ta iya buɗe ƙofar falon shiga cikin gidan, sannan ta shiga da sallama. Mutum ukun dake cikin falon suka amsa sallamar suna dubanta. Matar gidan Mummy ce da yaranta biyu, Sadiq da Maryam.
“Mummy ina wuni”
Ta gaidata tana durƙusawa. Cike da mamaki Mummy ta aje wayarta a kan sofa tana kallon Maimuna ƙawar ‘yarta Maryam.
“Lafiya kalau Maimuna. Me ya faru da hannunki?”
Mummy ta tambaya tana duban hannunta na hagu da ta riƙe. Maimuna ta ja hanci tana faɗin.
“Auwwa ce ta ƙona min hannuna, saboda na bayar da kunu bashi!”
“Allah ya saka miki!”
Faɗin Maryam tana nufar ƙawarta. Mummy kuma ta miƙe ta isa gaban Maimunan tana duban hannun nata, kasancewarta nurse a general hospital Haɗejia.
“Mts ba zan iya treating wannan raunin naki ba Maimuna. Abin da za ayi gobe idan kin fita tallar safe, sai ki bawa wata daga cikin abokan tallar taki ta jire miki kayanki, ki je asibiti ki sameni a can!”
Maimuna ta jinjina kai tana faɗin.
“To Mummy. Na gode”
Mummy ta ci gaba da kallon yarinyar cike da tausayawa.
“Kin ci abinci?”
Mummy ta tambaya tana kallon idonta da ya yi ja alamun tana jin yunwa. Maimuna ta sunkuyar da kanta ƙasa tana girgiza shi.
“Maryam ki je ki zubo mata abinci”
Mummy ta bawa Maryam dake dafe da kafaɗun Maimuna umarnin tana zaunawa. Maryam ta gyaɗa kai tana jan hannun Maimuna zuwa jikin kujera.
“Zauna a nan na je na zubo miki”
Maimuna ta zauna. Kuma da ma haka aka saba. Tun bayan fara ƙawancensu da Maryam ta fara zuwa gidan. Har ta kai ga ta saba da mahaifiyarsu da kuma yayan Maryam ɗin wato Sadiq.
Kasancewar Mummy mace ce me tausayi ya sa take tallafawa Maimunan. Tun da ta fahimci cewa tana cikin matsatsin rayuwa. Hakan ya sa a duk sanda rayuwa za ta mata zafi babu inda take kai kukanta da ta wuce gidan su Maryam ɗin. Kakarta Hajja wadda ta haifi mahaifinta kuwa ta tsufa sosai, idan tana zuwa mata da ƙorafi a kan Auwwa zai iya sawa ciwon Hajja ta tashi ta hawan jini.
Kawunta ƙanin mahaifinta kuwa ba sosai ta cika ganinsa ba. Dan idan ba gidan kakar tata dake unguwar Chadi nan kusa da Fantai ta yi ba, ba ganinsa take ba. A wasu lokutan ma sai ta yi sati tana zuwa gidan Hajjan ba tare da ta gan shi ba. Dan shi kullum yana gona ko kasuwa wurin aikinsa.
A wasu lokutan ma shi da kansa yakan zo domin ya dubata. Idan kasuwa ta yi kyau har kyautar kuɗi yake mata, ko ya sai mata wasu daga cikin magungunan cutarta…
“Ƙafar ma ciwo take?”
Tambayar Ya Sadiq ta dawo da ita zahiri. Hakan ya sa ta kalli ƙafarta ta hagu sanna tace.
“Yau da safe na tashi tana min ciwo”
“Ai da ma da sanyi sai a hankali. Ita sickler ba ta son sanyi, ga shi ke kuma rabin rayuwarki a cikin sanyi take… Ki yi ta haƙuri kin ji Maimuna. KADDARA CE!. Kuma da yardar Allah za ki cinye wannan jarabawar!”
Faɗin Mummy.
“Kina shan folic acid ɗinki?”
Ya Sadiq ya sake tambaya. Maimuna ta girgiza masa kai.
“Ban sha ba. Saboda aikin da ya min yawa yau ya sa ban sha tun safe ba. Kuma yanzu da na duba inda nake ajewa sai na ga ta ƙare. Saura palludrine kawai!”
Mummy na latsa wayarta ta girgiza kai tana faɗin.
“Allah ya kyauta”
A lokacin Maryam ta fito daga kitchen riƙe da plate. Ta aje mata a gabanta tana faɗin ga shi Maimuna.
“Na gode”
Maimuna ta mata godiya kamar yanda ta saba. Da yake tana jin yunwa sosai. Sai ta cinye abincin da wuri. Maryam ta bata ruwa ta sha ta gode Allah. Sannan ta godewa Mummy. Da za ta tafi Maryam tace za ta rakata. Sai Mummy tace wa Ya Sadiq ya tashi ya rakasu. Sannan ta bawa Maimuna kuɗin napep. Wanda za ta yi amfani da shi wurin zuwa asibitin.
Su uku suka fita daga gidan. Sai da suka raka Maimuna har layinsu. Sannan suka yi sallama suka juya. A sace Maimuna ta shiga gidan. Ta saka sakata. Sannan ta shiga ɗakinta ta ɗaura gidan sauro. Ta shiga ta kwanta tana jin yanda sauraye ke cizonta. Saboda net ɗinta da yake a ɓule.
Ga kuma sanyi da ya dameta. Ita fa tun ba yau ba ma ta riga da ta san cewa ikon Allah ne ya sa take rayuwa har yanzu. Amma ba dan ikon Allahn ba bata jin me cuta irin tata zai kasance a halin da take ciki, kuma ya ci gaba da rayuwa.
*No.42, Inuwa Wada crescent, Utako, Abuja.*
FARUK POV.
A hankali ya tura ƙofar ɗakinsa da ya fito daga ciki ya rufe. Sannan kai tsaye ya soma taka strais zuwa ƙasa. Abu na farko da ya fara arba da shi a ƙasan shi ne. Matarsa Mariya da kuma ɗansa Hilal.
“Babana”
Ya faɗi yana ɗaukan ɗansa ɗan wata goma sha ɗaya da haihuwa. Kafin ya juya ya kalli matar tasa dake zaune a kan sofa.
“Mary!”
Ya kirata da sunan da shi kaɗai yake kiranta da shi. Mariya ta ɗaga kai ta kalle shi. Kafin ta aje wayarta da take latsawa a kan sofa ta miƙe tsaye.
“Fita za ka yi?”
Ta tambaya ganinsa sanye da kayansa na aiki. Wato kakin sojoji. Kasancewarsa soja. Ya shafa kan yaronsa da ɗayan hannunsa yana faɗin.
“Eh zan fita”
“A dawo lafiya”
Kawai ta faɗi tana karɓar Hilal ɗin dake hannunsa. Sannan ta koma ta zauna tana aje yaron a gefenta. Faruk ya kalleta sanna ya girgiza kansa ya juya ya fita.
Shi har yanzu ya kasa gane abin da yake damun Mariya. Yanzu kusan shekaru uku da aurensu shi da ita. Amma har yanzu babu wata shaƙuwa ta musamman irin wadda ake buƙata tsakanin miji da mata a aurensu.
Bayan kuma auren soyyaya suka yi shi da ita. Kasancewar ita Mariyan ƙanwa ce a wurin abokinsa Mu’az. Kuma ta hanyar Mu’az ɗin ya fara ganinta. Har ta kai ga ya fara sonta. Kuma ba tare da ɓoye-ɓoye ba ya furta mata cewar yana sonta.
Kuma ita ma ta nuna amincewarta kan hakan. Shi ya sa ba a daɗe ba aka yi aurensu. A farkon aurensu ba zai ce babu soyyaya ba. Amma tun bayan da ta samun cikin Hilal komai ya sauya. Duk da da ma can ita ba mace ce me yawan magana ba.
Gaisuwar da sojoji biyun da suke gadin gidansa ke masa ce ta dawo da shi zahiri. Ya dube su yana amsawa. Kafin suka buɗe masa gate ya fita da motarsa daga gidan. Sai da yafara biyawa ta gidan mahaifiyarsa Hajiya dake kusa da nasa gidan.
Ya gaisheta kafin ya wuce wurin aiki. Kasancewar akwai wani aiki na binciken mutuwar abokiyar aikinsu dake gabansu ya sa yana zuwa barrack bai nemi kowa ba sai Mu’az. Aboki, kuma abokin aikinsa.
_Share fi sabillilah❤️_
______________
Za ku iya karanta wannan littafin a ArewaBooks, da ma wasu litattafaina na baya @SalmaAhmad. Sai kuma Wattpad @Salma_Ahmad_Isah.
Saboda page ɗin can za su fi na nan tsayi. And don’t forget to follow, like, share and comment.
*Daga alƙalamin Salma Ahmad Isah✍️.*
*CANDY CE🦋.*
°°°°°°°°°°°°°°°°°°
*ƘADDARA CE!*
*©SALMA AHMAD ISAH.*
*CANDY🦋*
_ArewaBooks @SalmaAhmad_
_Wattpad @Salma_Ahmad_Isah_
*Paid book*
*02*
*No.53, off Justice Clara Ogunbiyi street, Asokoro, Abuja.*
MU’AZ POV.
Mutum biyar ne zaune a kan dinning table suna yin breakfast. Shi kaɗai ne a cikinsu yake cin abinci da hannunsa. Yayin da kowa yake ci da spoon. Mahaifiyarsu Hajiya Hauwa, wadda suke kira da Mummy ce ta dube shi.
Yanda ya dage yake cin abincinsa bil haƙƙi da gaskiya. Dan idan kana so ku saɓa da Mu’az a ƙi ba shi abinci lokacin da yake jin yunwa. Idan kuma kana so ka burgeshi ka masa kyautar abinci ka ga ƙauna. Shi da abinci 5 and 6 ne.
Shi ya sa kaf yaran gidan su biyar. Wanda suka ƙunshi babbar yayarsu ‘yar matar Daddynsu ta farko wadda Allah ya yi wa rasuwa. Me suna Farida. Sai shi da ya kasance ɗan Mummy na farko, sai Mariya da take bi masa. Sanna Safiyya da ta ci sunan mahaifiyar Daddy, suna mata inkiya da Mima. Sai auta Na’im. Duk cikinsu ya fi kowa ƙiba. Duk da shi ma ba wai ƙibar ya cika ba. Amma ya fi su jiki. Sai Mima da ita ma take da ‘yar ƙiba.
Kuma a duk cikin yaran Daddy su biyar, ya fi kowa farin fata. Dan shi farin Mummy ya biyo su kuma duk baƙin fatar Daddy suke biyowa. Hakan ya sa ya fita da ban a cikinsu. Idan ka ganshi ba lalle kace ɗan gidan ba ne. Saboda yana da fari sosai, saɓanin sauran ‘yan uwansa da suka kasance baƙaƙe.
“Mu’az!”
Mummy ta kira. Hakan ya sa ya ɗago da fararen idanuwansa ya ɗora a kanta yana amsawa.
“Na’am Mummy”
Cikin tsare shi da ido Mummy tace.
“Me ka je ka aikata a gidan Hajiya Hadiza?… Jiya da daddare bayan ka dawo daga gidan ta kirani tana ta masifa!”
Maganar Mummy ta janyo hankalin kowa kansu. Shi kuma sai ya yi murmushi yana maida hankalinsa kan cin abincinsa. Dan ya tuno da tsiyar da yaje ya yi a wurin yarinyar aminiyar Mummy da tace masa ya je dan su daidaita juna.
“Ka san baka da gaskiya ke nan?”
Faɗin Mummy. Alhaji Jibrin Gimba Gashuwa ya kalli matarsa yana faɗin.
“Me ya yi kuma?”
Cike da jin haushin abin da ya aikatawa ‘yar aminiyarta Mummy tace.
“Tsabar shi abin magana ba ya masa kaɗan. Ya taka ya je har gidan aminiyata Hajiya Hadiza, dan ya ga ‘yarta Rashida su daidaita. Tun da shi ya kasa zaɓawa kansa matar aure. Wai ya dubi Rashida ya ci mata mutunci, har da cewa wai ita ƙazama ce. Kuma ta masa kaɗan a matsayin matar aure!… Maganganu dai babu daɗin ji!”
Daddy ya dubi Mu’az dake murmushi. Kafin ya kai ga cewa wani abu, Mu’az yace.
“Iyaka abin da na ce kawai ta faɗa. Ba ta faɗa miki abin da ita ‘yar tata ta min ba?”
“Me Rashidan ta maka?”
Daddy ya tambaya.
“Saboda Allah Daddy. Kamar ni Mu’azzam Jibrin Gimba za ta shanya a ƙofar gida ina jiranta. Wai tana kwalliya?. Ko me za ta yi wa kwalliyar?. Wannan mummunar baƙar ƙazar fuskar tata da bata rabo da majina sanda tana yarinya ko me?… Kuma da ma can fa ni ba ta min ba. Yarinyar ba class ɗina ba ce. And ta cika rawar kai da yawa!”
Cike da mamakin abin da yayanta ke faɗi a kan Rashida Mima ta ɗaga kanta sama tana hango fuskar Rashidan. Ko ita da take mace Rashida na burgeta. Saboda iya wankanta da son gayu. Amma tsabar wulaƙanci irin na Mu’az cewa yake wai ƙazama ce!.
“Ya Mu’az Rashidan ce ƙaz…”
Shiru ta yi saboda kallon da ya mata. Ta haɗiye maganar ta kora da miyau ɗin bakinta. Mu’az ya harareta yana faɗin.
“Ƙaramar mara kunya!…”
“Sannu shugaban marasa kunya!…”
Faɗin Mummy a ƙufule ita ma tana wurga masa harara.
“Mu’az”
“Na’am Daddy!”
Ya amsa a ladabce.
“Rashida ce ba ta maka ba ko wata ɗabi’a ce gareta wadda baka so?”
Ya yamutsa fuska yana faɗin.
“Ta min ƙanƙanta da yawa. Sa’ar Mima ce fa Daddy. Kuma taba da rawar kai. Ga ta cika iyawa… Gaba ɗayanta ma bata min ba. I dislike her at all!…”
“Ka kyauta. Ka kyauta da ka zubar min da mutunci a idon aminiyata”
Mummy ta tari numfashinsa.
“Hauwa! Kin san ni me son abin da yarana suke so ne. Tun da har baya sonta babu yanda za ayi na aura masa ita. Da ace yana sonta kuma sai inda ƙarfi na ya ƙare wurin neman aurenta!”
“Shi ya sa nake sonka Daddy. You’re the best!”
“Ban gama da kai ba ai… Dan baka son Rashida bai kamata ka riƙa kusheta ba. Hakan babban kuskure ne. Da fatan za ka kula nan gaba!”
Sai ya sunkuyar da kansa yana faɗin.
“To Daddy. Za a gyara!”
Wayarsa dake aje a gefen plate ɗin da yake cin abinci ce ta shiga ringing. Hakan ya sa ya ɗauka domin duba me kiran, ganin Faruk ne ya sa ya amsa.
“My Gee what’s up?”
“Fine Wallahi. Ya ? Me ya sa ba ka zo barrack ba har yanzu?”
Mu’az ya miƙe tsaye wayar kare da kunnensa ya nufi sink domin wanke hannunsa da yaci abinci da shi. Saboda shi duk rintsi duk wuya ba ya cin abinci da spoon ko fork.
“Cin abinci na tsaya. Ka san aikin nawa ma ba zai iyu ba ba tare da na cika cikina ba!”
“Aikin ke nan ai. To sai ka yi sauri ka zo dan mu je mu haɗu da Muktar (Ɗan sandan da yake bincike a kan case ɗin mutuwar Munira) ɗin. Tun da yace gobe zai yi tafiya”
Mu’az ya goge hannunsa da toilet paper yana faɗin.
“On my way”
Daga haka ya sauƙe wayar ya dawo dinning area.
“Mummy ni zan tafi… An jima zan aiko driver ya zo ya karɓa min abinci!”
Mummy ta wurga masa harara tana faɗin.
“Saboda ga Mummy baiwarka ka aje za ta maka girki ko?”
Mu’az ya ƙunshe daiyarsa.
“Oh lord of mercy!”
Ya faɗa, sannan ya kalli Mima.
“‘Yar lukuta ki min girki zan aiko a karɓa min. Yau Mummy ta yi fushi da ni!”
Ba dan Mima ta so ba haka ta gyaɗa masa kai. Dan ita yau ta riga da ta tsara fita tare da ƙawayenta. Kuma bata isa ta masa musu kan ba za ta yi ba. Ita a wa?. Yanzu sai ya hauta da bala’i. In ba sa’a ba ma ta kaisu ga duka.
“Oga tulele ka gama mu je na sauƙeka?”
Ya faɗi yana kallon Na’im. Na’im ya ɗauki bagpack ɗinsa yana faɗin.
“Eh na kammala mu je”
Suka yi wa Daddy sallama suka fita tare. Mummy ta yi ƙwafa.
“Wai yanzu haka za’a zuba masa ido ya zauna babu aure?. Ga shi Mariya da take ƙanwarsa har da yaro ɗaya. Amma shi tsayuwa da ‘yan matan ma ya ƙi. Ballantana har a fara batun yin aurensa!”
Daddy ya yi murmushi yana sipping tea ɗinsa. Ya aje mug ɗin yana faɗin.
“Hauwa ke nan!. Shi fa aure da mutuwa duk lokaci ne da su. Idan Allah ya nufa sai ki ga an yi nan kusa. Wata ƙila kuma shi nasa rabon a nesa yake”
“Hum-um. Ai bana jin Ya Mu’az zai yi aure kwana kusa Daddy. ‘Yan mata nawa Mummy ta masa?. Amma duk cikinsu cewa yake babu wadda ta masa. Har da wadda yace warin baki take. Ai babu me iyawa wannan mutumin sai Allah. Ga zafin zuciya kamar garwa shi. Ga hancini!. Ga faɗar baƙar magana kamar jikan kutare!…”
“Duk zai daina with time. Har yanzu Allah bai haɗa shi da wadda za ta dace da shi ba ne…”
Daddy ya katseta. Mima ta taɓe bakinta tana ganin rashin iyuwar hakan. Dan a ganinta, babu budurwar da za ta iya zama da yayanta da halayensa. Su ma da suke ‘yan uwansa wasu lokutan kasa ɗaukan halin nasa suke ballantana wani da ban.
*Nigerian Army resources center, Mambilla Barrack, Asokoro, Abuja.*
“Hello! Sirikina ina kwana”
Faɗin Mu’az a lokacin da ya shiga office ɗin Faruk dake jiransa. Dan bayan ya je ya aje Na’im a school kai tsaye ya wuto nan barrack ɗin. Saboda daga gidansu zuwa Barrack ɗin ba nisa.
Faruk dake tsaye a jikin shelf yana duba wani file ya jiyo ta kalli Mu’az ɗin dake shigowa office ɗin. Kamar kullum, sanye yake da wandon kakin sojoji, da kuma rigar da suke sakawa a ƙasan rigar uniform ɗin nasu me kama da T-shirt. Amma shi kam da ma abu ne me wuya ka gan shi sanye da complete uniform.
A cewarsa waccan ta saman takura shi take. Saboda shi da riga kamar maƙiya suke. Idan ka gan shi da complete uniform to meeting zai shiga, ko kuma akwai wani wurin da zai je ba barrack ba.
“Sannu da zuwa sir”
Faɗin Faruk yana sarawa Mu’az ɗin. Kasancewar shi ne sama da shi. Mu’az ya cire glasses ɗin idonsa yana faɗin.
“Karka sa na ji kunya mana sirikina. Ni ban san wannan abin. Ka share kawai”
Faruk ya sauƙe hannunsa yana murmushi. Dan wannan ɗin magana ce wadda ya haddaceta a cikin kansa.
“Ina ɗana?”
Mu’az ya tambaya.
“Lafiyarsa ƙalau.”
“An jima muna da meeting da general Haladu Mansur. Gwanda mu je mu ga Muktar kafin lokacin ya yi”
Ya faɗi yana maida glasses ɗinsa.
“Okay”
Daga haka suka fita zuwa FCID domin jin yanda binciken mutuwar abokiyar aikinsu ya kwana.
*FCID (Force Criminal Investigation Department), Moshood Abiola Road, Garki, Abuja.*
“A halin yanzu mun yi nasarar gano wuri na ƙarshe da ta halarta kafin ta ɓata. Kuma abin da muke ta ƙoƙarin yia yanzu shi ne gano wanda ta haɗu da shi a wurin. Saboda mun gano wani saƙo a wayarta dake nuna cewa wani ne ya kirata zuwa wurin domin su haɗu. Daga zarar mun samu damar gane wanda ya aiko mata da saƙon za mu iya cewa mun kama me laifin. Saboda shi ne abin zargi na farko!”
Mu’az da Faruk suka dubi juna a tare. Kafin suka kalli Muktar ɗin da ya gama zayyano musu bayanin.
“Lord have mercy!”
Faɗin Mu’az yana furzar da iska ta bakinsa. Yayin da Faruk da ya fi kowa shiga damuwa a kan case ɗin ne ya shafa kansa cike da damuwa.
Saboda ɓatan abokiyar aikin nasu me suna Munira tashi ɗaya ya basu mamaki. Hakan ya sa suka bazama nemanta a ko ina. Bayan sati ɗaya da ɓatanta kuma suka samu labarin tsintar gawarta a wani layi. Babban abin tashin hankalin ma shi ne an tsinci gawar tata ne ba tare da wasu sassa na jikinta ba.
Saboda tsabar yanda makashin ya bata wahala wurin kasheta ya sa su kansu ba su tabbatar da cewa gawarta ba ce sai da iyayenta suka zo suka tabbatar da cewa ita ce. Kuma tun bayan rasuwarta da Mu’az Faruk ba su huta a kan binciken wanda ya kasheta ba.
“Ka yi haƙuri Kaigama. Da yardar Allah za’a kama mai laifin”
Faɗin Mu’az a ƙoƙarinsa na kwantarwa da Faruk hankali. Ganin yanda suka fito daga headquartern duka a dame. Cike da damuwa Faruk ya dube shi yana faɗin.
“Har yanzu na kasa mantawa da hoton gawarta da na gani a idona MJ. Kuma hoton tashin hankalin da ahalinta suka shiga lokacin mutuwar ya kasa fita daga kaina. Ba na jin hankalina zai kwanta idan har ban kamo me laifin nan ba MJ!”
Mu’az ya dafa kafaɗarsa.
“Insha’Allah za mu kamo shi!”
“Allah ya yarda”
MAIMUNA POV.
Kamar yanda ta saba farkawa sassafe haka ta farka a asubar yau ma. Abu na farko da ta fara yi shi ne alwalal sallahr asuba. Ta dawo ɗakinta ta tada sallahr. Kuma bayan ta idar ta fita tsakar gidan ta fara aikinta na safiya kamar yanda ta saba.
Duk da yanda sanyin safiyar yake sauƙa a kanta bata haƙura da aikin ba. To da ta isa ma ta haƙura da aikin?. Ita a wa?, Kare da gudun layya?. Sai da ta yi shara. Sannan ta wanke kwanukan da aka ɓata a daren jiya. Kafin ta zauna ta fara firar doyar da za ta dafa ta kuma soya domin kai wa makarantun safe dake kusa da su. A lokacin Auwwa ta fito daga ɗakinta tana hamma.
Kanta ta ɗaga ta kalli Auwwan. Sannan ta gaisheta a ɗarare. A ranta take ƙiyasta lokacin da Auwwan ta tashi. Dan ta san lokacin dai ƙarfe bakwai za ta yi. Kuma ita ba ta isa ta tasheta a bacci ba. Saboda kyakkyawan warning ne daga Auwwan, kan kada ta kuskura ta tasheta idan tana bacci.
A kan idonta Auwwan ta ɗauki buta ta yi alwala. Sannan ta shiga ɗaki domin yin sallah. Sai da a kammala fere doyar sannan Gambo yayanta ya shigo gidan. Kallonsa ta yi tana gaishe shi. Ko kallon arziƙi bata samu daga gare shi ba. Ballantana har ta yi zaton zai amsa gaisuwar tata.
A tasowarta a gidan bata jin akwai rana ɗaya da suka taɓa yin magana da ɗan uwan nata ta minti biyar ta arziƙi. Ko kalo bata ishe shi ba ballantana har su samu damar yin hira. Kuma da ma shi ba zama yake a gidan ba. Kullum yana waje wurin abokansa masu hayar napep.
“Ke Maimuna!”
Auwwa ta ƙwala mata kira daga cikin ɗakinta bayan Gambo ya shiga ɗakin.
“Na’am”
“Ki yi maza ki ɗora ɗumamen tuwo yanzu. Gambo yace yunwa yake ji”
“Auwwa na ɗora tukunyar doya fa”
Tsautsayin shan zagi ya sa bakinta ya suɓuta wurin faɗar hakan. Ai ko an danƙaro mata zagin. Dan sai da Auwwa ta zaɓo wani zagi tun na zamanin maguzawa ta makawa uwarta dake cikin ƙasa.
“…Gidana ko gidanki?. Da har zan ce ki yi abu ki kawo son ranki”
“Allah ya baki haƙuri”
Maimuna ta faɗi. Tana nadamar maganarta ta farko. Jiki na rawa ta sauƙe ƙatuwar tukunyar doyar da ta ɗora. Sannan ta ɗora ta ɗumame.
“Kuma ki cire bayan tuwon da ya bushe”
Ta ji Auwwa ta sake faɗi daga cikin ɗakin.
“To”
Ta amsa wani sashi na zuciyarta na farin ciki. Dan ta riga da ta san yau babu rabonta a ɗumamen nan. Kuma tun da Auwwa tace ta ɓare bayan tuwon tana nufin ta zubar bata so. To ita kuma da wannan damar take amfani wurin rage yunwar da take damun cikinta. Dan idan ta ɓare bayan wankewa take, sai ta ɗan saka yaji ta ci.
Yau ɗin ma haka aka yi. Tana ɓarewa bayan tuwon shinkafar da ya bushe ta saka musu tuwon a cikin miyar dake kan wuta. Yayin da ta zube bayan tuwon da ya bushe a roba, ta wanke shi, tafaki ido ta zuba yaji a ciki. Ta koma gefe ta cinye.
Sannan ta wanke robar ta aje. Ta dawo ta sauƙe tukunyar ɗumamen. Ta sanar da Auwwa cewa ɗumamen ya kammala. Kafin ta mayar da tukunyar doyar kan wuta. Tana zaune a wurin. Auwwa ta fito ta zuba ɗumamen a kwanika biyu, ɗaya nata ɗaya kuma na Gambo.
Maimuna bata ta shi daga gindin murhun nan ba sai da ta gama dafa doyar, sannan ta soyeta da fulawa tas. Ta faɗawa Auwwa cewa ta gama. Auwwan ta zo ta zauna ta lissafa kuɗin doyar. Sannan ta saka mata a cikin bokiti fallasa.
“Ta dubu uku da ɗari biyar ce. Saura kuma yau ma ki bada bashin”
Faɗin Auwwa tana hararta. Maimuna ta gyaɗa kai tana nufar randa.
“Ub*n me za ki yi kuma?”
Ta juyo a tsorace tana faɗin.
“Na ga hantsi ya fara ɗagawa ne. Shi ne zan zuba ruwa a bokita na aje a rana. Kafin na dawo daga talla na san ya yi ɗumi sai na ɗan yi wanka da shi!”
Auwwa ta maka mata harara haɗi da jan tsaki. Sannan ta miƙe ta ja tulelen jikinta ta shiga ɗaki. Maimuna ta zuba ruwa a bokita. Ta aje a rana. Sannan ta shiga ɗakinta ta saka hijabina ta fito tana ɓoye kuɗin babur ɗin da Mummy ta bata.
Ta ɗauki bokitin doya da fulawar ta fita. Kasancewar yau ƙafar tata bata ciwo ya sa ta isa makarantar Famfo goma da ta fi kusa da su da wuri. Dan a yankin unguwar tasu kusan makarantu shida ne. Kuma duk ciki babu wadda bata kaiwa tallahr doya da fulawa da safe.
Tana isa makarantar ta wuce sashin da ‘yan tallah ke taruwa a babbar makarantar ta ‘yan mata. Kasancewar government school ce ya sa masu kawowa tallar kayan suke taruwa da yawa. A kusa da wadda ta fi sani cikin ‘yan tallar me suba Rahina ta aje bokitinta.
“Yau kin zo da wuri Maimuna. Dan sauraminti goma a fito tara”
Faɗin Rahina. Mamuna ta yi murmushi.
“Dan Allah Rahina so nake ki jire min kayana zan je asibiti a dubani!”
Rahina ta dubeta. Kasancewar ta san cewa su masu scikler ba’a raba su da jinya, ballantana kuma yanzu da ake cikin lokacin sanyi da cutar ta fi yawan tashi yasa tace.
“Ƙafar ce ko bayanki ne yake ciwo?”
“A’a. Ai yau da na tashi ban ji ciwon ƙafar ba. Auwwa ce ta ƙona ni jiya da dadare!”
Ta ƙarashe tana nuna mata singalin hannunta na hagu da ya yi alamar ƙuna. Dan fatar wurin har ta tashi Cike da jin tausayinta Rahina ta kawar da kanta gefe tana kare fuska.
“Subhannallahi. Wallahi Maimuna Auwwa muguwa ce”
Maimuna ta sunkuyar da kanta tana gyara ledar dake kan murfin bokitinta. Sannan ta ɗaga kai ta kalli Rahina dake kallonta.
“Bari na je”
“Amma kar ki daɗe”
Maimuna ta gyaɗa kai tana miƙewa. Kuma kai tsaye ta nufi bakin titi. Domin hawa napep, wadda za ta kaita Haɗejia general hospital. Duk da asibitin bata da nisa da unguwar Fantai.
Da yake ta san sashin da Mummyn su Maryam take sai bata sha wahalar nemanta ba. Kai tsaye ta je ta sameta a inda suke zama. Kuma Mummy ita ta kaita aka ɗaye fatar ƙunan da ta tashi. Sannan aka saka mata magunguna.
Kuma a pharmacy ɗin asibitin Mummy ta sai mata magungunan da aka rubuta mata, har ma da wanda ba’a rubuta ba. Wato magungunanta na cutar sickler. Kasancewar ta sanar mata cewar nata sun ƙare.
Basu rabu da Mummy ba sai da ta sai mata dafaffen ƙwai. Dan ko ba’a faɗa ba ta san cewa Maimuna na buƙatar kayan ƙarin jini. To kuma sai ƘADDARA ta sa ta taso a gidan da abincin da za ta sa a cikinta ma gagararta yake. Ballantana ta samu wanda zai ƙara mata jini. Haka Maimuna ta yi ta mata godiya har suka rabu ta dawo makarantar Famfo goma.
Leave a Comment